ثقافة عاطف بن حسين يتوجه بالشكر الى هؤلاء ويعلق على الجدل الذي أثاره مسلسل المنارة
في تدوينة مطولة نشرها عاطف بن حسين على صفحته الخاصة على موقع الفايسبوك، توجه مخرج مسلسل المنارة بالشكر الى عديد الأشخاص الذين ساندوا العمل وآمنوا بالمشروع وعلق على الجدل الذي أثاره مسلسل كما يلي:
"اول مرة باش نقول كلام من النوع هذا فقط باش نفسر لشوية بهايم و شوية مرتزقة متسمين على الابداع و قابلينهم فوق من قلوبنا وساكتين عليهم باسم الديمقراطية وان لم تستح فافعل ما شئت، انا الحق ماكانش عندي وقت باش نجاوب بالرغم الي انا هزيت تاليفوني وطلبت زوز من الناس عندهم قيمة عندي، فسرتلهم شوية الي قاعد يصير وما نعرفش كان صدقوني والا تماداو على قدام .... على كل ملي بدات تجربة مسلسل «لمنارة» من تاريخ 31 ماي 2016 لليوم رينا كل شيء، رينا الابداع من ناس خشان ياسر ورينا السقاطة وقلة الرجولية من برشة ناس،
خليوني الساعة نبدى بالحاجات الباهية و من باب معرفتك في الرجال كنوز و الرجلة الي نحكي عليها ما عندها حتى علاقة بالاعضاء التناسلية ،،، يعني قابلت نساء ارجل من مئة راجل و توة نقلكم عليهم ،،،
نحب نبدى نشكر في الناس الي وقفوا معانا و باش نبدى بقناة الحوار التونسي القناة الاولى الي امنت بالمشروع و بفضل المشروع رجعت علاقتي بسامي الفهري طيبة و قايمة على مهنية واضحة و هذا اول كف للنبارة اصحاب النفوس المريضة المختصين في هزان و ترجيع الكلام ،،، ثم نشكر مريم زوجتي و حبيبتي الي حماتني و حطت روحها في خطر من اجل استكمال المشروع ...
وتوة نحكيو على التفاصيل متاع الخطر من بعد ... نشكر ظافر بن مامي الزعيم و فعلا كان زعيما بالخدمة النظيفة الي قام بيها و كيف نقول نظيفة نقصد اش نقول رغم الاغراءات الي جاتو باش يجبد بينا و يمشي وما يصيرش المشروع و كان راجلو كمل معانا.
نحب نشكر المشتشهرين الي وقفوا معانا رغم حملات التشكيك الي قاموا بيها البعض من المهننيين و تشكيكهم في مشروعنا ... نحب نشكر الممثلين و مانيش باش نسميهم لانهم عايلتي و صحابي و جزء مني و من حياتي نعم خدمت المشروع مع عايلتي و صحابي الي هوما اكثر من ستين ممثل ، اشكون كيفي عندي العدد الهايل هذا من الصحاب و العايلة ... نحب نشكر التقنيين و باش نسميهم
- حيدر ولد علي ، المحاسب المالي الخشين رغم غياب المال احيانا ، حط روحو في الواجهة و تحمل المسؤولية للاخر
- معز الشيخ صديقي افضل مهندس صوت في تونس و على مسؤوليتي ،،، كنت صبورا و كنت نحس اننا نخدموا في مشروعك
- نانو .. مساعدة المخرج الاولى كنت ارجل من برشة ذكورة يدوروا قدامنا
- سلمى بوزقرو ... السكريبت و هاهي جايتكم على مهل طفلة متشبعة بالصورة
- منذر قدمة و دالي و ستارليتا و جمال و عماد نويرة و فؤاد و فريق الاضاءة الجميل مرجلكم صحابي الباهين
- شهاب الجويني و عم نورالدين و حمدي و محمد في التنسيق و الخدمة الكبيرة الي خدمتوها عمري ما ننساها
- احلام ، متربصة ، كانت ارجل من برشة ذكورة و حملت حمل كبير في المسلسل ناهيك و انها سكريبت متربصة و لقات روحها وحدها بعد ما غادر تنا مصممة الملابس المحترفة جدا جدا بعد ثلاثة اسابيع و بعد ما غادرتنا مديرة الماكياج المحترفة جدا جدا بعد اسبوع من العمل و اهل المهنة يعرفو خطورة المغادرة هذي
- نشكر صديقتنا وفاء الهمامي الصحفية الصادقة و معاها بعض وسائل الاعلام الي ساندونا
- الفنان مهدي شقرون واضع موسيقى المسلسل بصوت الفنانة لبنى نعمان و توزيع سامي معتوقيى و كل المجموعة الي هداولنا موسيقى عالمية ، نحبكم برشة
- و كيما نشكر البقية الي خدمو معانا دون حسابات، و في المقابل خدموا معانا ناس في اول تجر بة ليهم في مسلسل على غرار الماكيوز و مصممة الملابس و مدير الانتاج الي غادرونا بعد ما وحلونا فمة زادة ناس من تقنيين و يخدموا اول مرة في التلفزة اختصاصهم كل جمعة يوقفولنا الخدمة بتعلة الفلوس الي ما نجموش يصبرو معانا رغم الي انا شخصيا وريتهم العقود متاعنا الكل و عطيناهم شيكات ضمان في فلوسهم رصاتلنا مصورين 42 يوم اي ناقصين على الاقل ستة ايام و ما كفاهمش هذا فكولنا ما صورناه و عملولنا كل اساليب الضغط باش يخلصو و في فلوسهم كاملة ، تفوه على هذه الاخلاقيات وين تعلمتوها و اللعنة علي مازال يعيطلكم تخدموا و اذا كان انتم محترفين ....
نسيت باش نشكر انيس العياري مصمم الملابس و معاه صديقتنا ايمان. رغم المرض انقذ ونا بعد ما مشات مصممة الازياء العالمية هههههههههه
و نسيت باش نشكر انيسة الماكيوز الخشينة الي لليوم ما سمعتهاش احتجت و خذات القطار وهو يسير و عوضت «عرفتها» الي مشات و شوية لا دمرتلنا مشاهد من المسلسل ...
نحب نعتذر للي نسيتهم اصدقاءي الباهين الي ما سمعتش صوتهم جنود. الخفاء
نحب نشكر اصدقائي من خارج الدومان سي وجدي سي حاتم ، رياض ولد بلادي الشهم و صديقنا نادر الرحموني و صديقنا محمد، اهالي الشابة البسطاء الي حللولنا ديارهم و كلينا ماكلتهم و فرحوا بينا و من غير ما ننسا ولد حومتي ناصف بنور
و خليوني نقول بعد ما كمل المسلسل و تبث انو اول مسلسل يتبث في علاقة بشركة خاصة بقناة خاصة و يربح و باش يكمل يخلص العباد في الاجال متاع العقود هذا ما يلزني باش نقول لهاك النبارة الفاشلين و الي متسمين على الفن انقرضوا وهف يهزكم براوا اخدموا و انتم كان التسطيكة و البهامة و نقلكم راني نعرفكم فردا فردا و ما تنساوش العام الي عديتو في وزارة الثقافة راني نعرف دوسياتكم الكلكم و فيكم من الناس الي تسب فيا شكون الدولة تسالو فلوس متاع افلام ما تعملتش و يقولوا الي مسلسل "لمنارة" متحصل على دعم وزارة الثقافة ، و يدبرولي في دوسي فساد براوا انقرضوا مخيبكم و مبهمكم ... و الا هاك الكمشة و للله الحمد الي هوما ماهمش برشة يدعيوا انهم ممثلين يتطاولوا على اساتذتهم برى لعنة الله عليكم دنيا و اخرة علمناكم كيفاش تتنفسو و كيفاش تتكلمو و كيفاش تربطو الجمل و اخرتها تطاولو علينا برى داء على مناظركم قلو ممثل و الا ممثلة ثم و هاك معشر الثقافوت النبارة الي عاملين رواحهم طز حكمة و هوما ساق هوني و ساق غادي تلمو..
و في الاخر و ليس اخيرا رانا باش نواصلو نخدمو مع الناس الباهين المتنورين بالقانون و النظافة و الي عندوا علينا اي دليل على عكس هذا فليتفضل و الشيكات الي خذيتوهم ضمان من قلة ثيقتكم باش تخلصو فيها و وجوهكم ما عادش باش نراوها و ريح السد براو اخدمو مع سيادكم الاخرين ما تنجمو تكونوا كان عبيد ليهم ....
ثم و قبل ما نغادركم نحب نشكر اخشن مونتور عشيري و خويا الكبير كريم حمودة و معاه خولة و ابتسام
و نشكر صديقي القديم نزار السويسي مصحح الالوان الي كان يخدم في وقت قياسي بحسو الرفيع
و صديقي انس السعدي المونتور الجميل الي ادخل في وقت قياسي و نقذنا من ضيق الوقت والميكسور طارق طيبة الي صبح معانا و تعبناه
السماء تتسع لكل النجوم ... عيدكم مبروك لكل الفنانين الباهين و لكل الناس الصافية المتصالحة مع ذواتها ....
كل الحب و عطلة سعيدة
وهذا راهو دفعة اولى على الحساب على خاطر نسيت برشة حكايات هههههههههههه".
